Na súa aposta de aportar maior competitividade ao tecido comercial da Comarca, FECIMO, comeza un novo ciclo de Xornadas de Formación e Networking de forma gratuíta para os seus asociados.

A Federación comeza cun Almorzo Networking que terá lugar o vindeiro día 26 de setembro ás 8.30 horas no espazo de “El SIETE – Huele que alimenta” e que estará conducido por Javier Cebreiros quen é Doutor en comunicación e graduado en Dirección de Empresas, socio de Impact HUB Vigo e Info JC, autor do libro “Esquece a túa linguaxe corporal” e quen foi seleccionado polas Nacións Unidas para participar no programa “Emprendedores para o cambio social”.

Neste novo formato FECIMO procura compartir ideas de forma distendida, poñer en común preocupacións e atopar respostas ou solucións a problemas cotiás na comunicación das empresas participantes.

Como ven sendo habitual este Almorzo networking é gratuíto para @s asociad@s aínda que o número de prazas estará limitado.

As novas XORNADAS DE FORMACIÓN que serán publicadas en breve son as previstas para:

o 2 de outubro “ALTERNATIVAS PARA A IMPLANTACIÓN DA LOPD NA PEQUENA EMPRESA” na que Javier Cancelas, Titulado universitario de experto e especialista en Protección de Datos e membro da Asociación Profesional Española de Privacidade e Secretario de relacións institucionais por Pontevedra da Asociación Unificada de Gardas Civís, explicará aos asociados como implantar un rexistro de actividades de protección de datos nun comercio/empresa que trata datos de escaso risco a custo cero e cunhas nocións básicas para un tratamento axeitado.

e o 16 de outubro “O COMERCIO QUE VEN” da man de José Manuel Castro Pérez, quen é responsable da Vixilancia Competitiva do Instituto Galego de Promoción Económica (IGAPE) e orienta e aconsella no desenvolvemento das súas estratexias a un gran número de empresas.