O vindeiro 23 de setembro FECIMO comeza unha nova campaña que aspira a fortalecer o vínculo emocional entre os comerciantes e os seus clientes, subliñando que ao elixir o comercio local están a contribuír non só á economía da localidade, senón tamén á preservación do seu patrimonio cultural e social.

É un chamado a valorar a diversidade de produtos e servizos ofrecidos polos negocios locais, que engaden autenticidade e personalidade á experiencia de compra.

“Sinte o weltanschauung do comercio local” non é só unha campaña de dinamización comercial, senón unha mensaxe poderosa que convida á comunidade para defender e celebrar a súa identidade a través do apoio activo ao comercio local. É a expresión da resistencia e a resiliencia fronte aos retos contemporáneos, asegurando un futuro vibrante e sostible para todos os involucrados na nosa querida localidade.

Con este lema, a campaña busca destacar a importancia do “weltanschauung“, termo galego que significa “forma de concibir o mundo e a vida“, recoñecido pola Real Academia Galega.

A analoxía proposta entre a resistencia do poboado galo de Asterix e Obelix contra os romanos, e a resistencia do comercio local fronte ás grandes superficies e xigantes electrónicos, é particularmente elocuente. Así como os galos defendían a súa identidade e territorio cunha apócema secreta, os comerciantes locais e os seus clientes utilizan o “weltanschauung” como a súa apócema máxica para enfrontar os desafíos dun mercado dominado por poderosos competidores.

Esta campaña non só busca evocar o espírito de unidade e resistencia entre os comerciantes locais, senón tamén transmitir aos consumidores o valor de apoiar o comercio de proximidade. O “weltanschauung” convértese nun símbolo da identidade local e da comunidade que defende os seus valores e tradicións fronte á homoxeneización e o anonimato que a miúdo caracterizan ás grandes superficies e plataformas electrónicas.

FUNCIONAMENTO DA CAMPAÑA

 A campaña consistirá nunha dinámica de fidelización comercial que dará a oportunidade aos clientes do comercio local de gañar premios directos, en formato de tarxetas regalos do comercio local, polo rexistro de códigos alfanuméricos obtidos coas súas compras no comercio local.

Deste xeito, cada vez que os clientes realicen consumos maiores a 10€ nun comercio ou empresa participante entre o 23 de setembro e o 13 de outubro, estas entregaranlle códigos alfanuméricos que terán que rexistrar en www.comerciodomorrazo.com para optar a algún dos premios instantáneos.

Deste xeito búscase achegar o público en xeral, pero especialmente ao xoven, e que máis desafección amosa co comercio local, ao comercio das súas vilas, xerando un aumento no sentido de pertenza da xente xoven co seu tecido comercial de proximidade.

Esta campaña de dinamización está organizada por FECIMO, a través das asociacións locais ACIBU, ACICA e ACIMO, cofinanciada pola Xunta de Galicia, a través da Dirección Xeral de Comercio e Consumo, e Abanca.