Quinta edición de “AMODIÑA”, Pasarela de Moda do Comercio do Morrazo, un evento de referencia na comarca para coñecer as propostas da tempada Outono/Inverno que estarán á venda no comercio local. Todo isto dentro dun gran espectáculo audiovisual con actuacións en directo.

Esta pasarela chega pisando forte para poñer en valor ás empresas do Morrazo. Presentará ao pé do mar, nun evento fresco e moderno, todo aquelo que se vai levar a próxima tempada, a través da escolla profesional de estilismos dos comerciantes de Bueu, Cangas e Moaña. AMODIÑA quere amosar a fortaleza das pequenas empresas de confianza que nestes tempos merecen toda a visibilidade que esta pasarela pode ofrecerlles.

Amodiña reúne cada ano a milleiros de asistentes. O acceso a este espectáculo ao aire libre, continúa a ser de balde. Este escaparate urbano contará con actuacións musicais e coreografías de baile que se intercalarán entre os pases.

AMODIÑA volve a contar este ano con Boombox Escuela Urbana, dirixida polos irmáns Yara e Kevin Juncal Graña, formados con profesores internacionais, coreógrafos de grandes artistas como Beyoncé, Michael Jackson, Usher, Janet Jackson, etc. Farán unha demostración dalgúns estilos de Danza Urbana que imparten nas súas clases.

Nas actuacións musicais contarase con Carlota Domínguez, formada en canto lírico que transmitirá paixón e sentimento coa súa interpretación de temas icónicos da música. Estará acompañada polo DJ Aaron Viéitez Calo

O conductor do evento será Rafa Durán, coñecido polo seu traballo en programas da TVG e algunhas series nacionais, cunha ampla experiencia como presentador, cómico, actor, reporteiro, rexedor-animador de público…e un longo etcétera. Actualmente de xira co seu espectáculo “El show de Rafa Durán” mesturando monólogo, improvisación, música, xogos co público e moito confeti.